Kronika našega molega mista
UREDNIŠTVO
  • Chobon 1311
  • Chobon 1612
  • Chobon 1510
  • Chobon 2511
  • Ne odgovoromo na natpise u komentorima...Mi postavijemo i pisemo tekstove, a komentirote Vi..
Kontakt:
  • cobonsbracute@gmail.com
  • s obzirom na trenutni knockdown..imate mail za primjedbe,pitanja....
Anketa
na kronici komentirati mogu?


Rubrike
  • FOTOGRAFIJA TJEDNA
    Saljite svoje slike na mail kronike i jednom tjedno objavljujemo najzanimljiviju. Zahvahljujemo!
Sponzori
Blog - listopad 2009
petak, listopad 23, 2009
Odovna je to bilo, još se puno svita spominje ali nostoji zaboravit i o tien ne govorit, a zošto? Jer hi je srom. Mlaji svit o tien nezno puno jer ni stariji o tien nisu projali.
Rodnici Jadrankamena su se pobunili, u to vrime su se uvik ništo bunili, ne somo oni nego i njihove žene, matere, a skoro svi. Nisu to bile bune radi otkazih, neisploćenih ploć i drugih nevajonih stvori. Rodnici su se bunili da ni ni krešila ploća bar 30 do 40 % a ne somo 25%, da ni vajo dilit višak svaku dvo tri miseca a ne svaku šiest misieci da ni neva marienda, oćedu li primit trinaiestu, četrnaiestu ili još koju ploću. Zato su se bunili i če nojvažnije skoro su uvik uspili. Ali jedon put nisu, nikako ni mouogla ploća krešit 40% nego somo 20%, i drž vamo, drž tamo, organizirali su zbuor i to u Mahrincu. Duošla prvo smjena sa posla duošla drugo smjena ča hodila na posol i eto ti pun Mahrinac rodnikov i činovnikov, duošli su i svi rukovodioci koji su to i organizirali i počeli judima tumačit, ali zavraga. Ogadi obruži, naprtili hi grubih riči ča je i ča ni, spominjole se mrtve kosti, grube beštime, ma svašta, i čoviku duošlo zlo. Glovnemu rukovodiocu pozlilo,ćapalo ga odsrca, čovik umire, skočili vi kolo njega ,“dojte judi žmul vodie“ zavapi čovik. Dvo tri rodnika, oće nieće donili žumul vodie i onda mu ga prolili isprid nosa, niki su i zapleskoli.Čovik ni umri,donili su mu vodie i cukra, a je posli krešila ploća ni ni važno, važno je to da bilo komu pa i beštiji ako je potriba da pomogneš, da slabijega i nemoćnega zaštitiš.

Ni ovo priča izmišljena, nikuor će pomislit da je niko scena iz nikega Felinijevega filma, ne dogodila se ali da je bar ostalo na vuon priči, ne ona imo svuoj tihi nastavak, igroči su drugi, igra je prominila pravila. Rodnici Jadrankamena se više ne bunidu ča ni ploće nisu krešile ne tri miseca već 15 godišć, ne ča nimo viška nego nimo ni ploće, judi dobijedu otkaze, šaje hi se na biro a pri tega hi se zabebeli sa malo stinje i otpremninom koju ni se ne isplaćije, svaka šuša u vien mistu zno da je poduzieće u rasulu, da vlost čini kuco na čelu sa našon Općinom, a rodnici u strohu od otkaza zanimili, podmećedu jedon drugen, polovica ne govori jedon s drugin, prijatej prijateja krivo gledo, sve u svemu puno grubo. I onda je jedon mlodi rodnik pokušo ništo pomaknut, ne za sebe, nego za svoje mišćane, svuoga oca i pok. nuonota koji su tamo rodili cili svuoj život. Organiziro je niki „štrajkić“ i dobi je otkaz. Oni radi kojih je dobi otkaz, okrećedu glovu ko da se to njih ne tiče, nikor se ni digo, nikor ni zabeštomo, pobuni se i sad kad je i ovien mloden čoviku tribalo pomoć, ništa, i njemu su prolili žmul vodie isprid nosa.

Skupa je to voda u vien mistu.

A. Ford
Pucisca-bb @ 13:27 |Komentiraj | Komentari: 55 | Prikaži komentare
nedjelja, listopad 11, 2009
Judi moji, počela je nova, 13. po riedu sezuona Bročke malonogometne lige. Ovie godine liga broji 15 klubovih. Uz branitelja naslova Konobu Tomić, tuol su i Nevera Postira, Fortuna Povlja, Buol, Takmac, Sedmo Nebo, San Martino, Mrduja, Stivon, Nerežišća, Viver Duol, Povlja, Malo Vitra Bol i dvi pučiške ekipe, popularni Marin United i Sexy Flexy Bilbao.

SVI NA SVEMU - SF BILBAO!

Naša novo rubrika, izvorno nazvana "Baskijski kutak", ali u duhu pučiškega jezika sad preimenovona u "Baskijski kantunić", pratit će uspjehe i neuspjehe (ča manje vih drugih to boje) naših "Baska" iz Sexy Flexy Bilbaa.
Bustamante pozira za kroniku u noven dresu Sexy Flexy Bilbaa
Baski u novu sezuonu griedu pojačoni Ivanon Bezmalinovićen Bezmon koji je lonjskih godin broni buoje Pizzerie Marin. Nova mlodo akvizicija je i moli Jure Konjin. Ne tribo napomienut da je kičma ekipe ostala ista ko i loni. Tuol su Mirko Mačor, Nikola Guerrieri, Bustamante, Bažo, Mrtuorij, Pomagačo, Rino Prijević, Vedran Šilo, Dido i, naravno, Iskusni.
Pruošle godine je malo falilo da ovi muomci ujdedu u playoff, a pri 15-ak don su nesretno ispali u polufinalu turnira za sv. Jieru. Uz malo sriće, vie godine bi tribali duoć do playoffa.

PIZZERIA MARIN POSTALA MARIN UNITED

 Niećemo izostavit ni vijesti o drugin pučiškin klubovima ko ni općenito o Pučišćanima u BLMN. Uz već navedeni SF Bilbao i Pizzeria Marin će igrat ligu, ali s udruženin snogami sa Gornjohumčanjanima pa će vie godine MNK Marin United bit ime kluba sa Solin. Vuod će bit i rubrika "solinski šank" za sve ljubitelje dobre kapljice i malog nogometa sa Solin. Od lonjske ekipe tuol su Mirko, moli Marin, Ivan Prijević, Viktor i Jakov. Virujemo da ovie godine nieće bit toliko nepotrebnih kiksevih ko loni i da će se Marin United borit za naslov.
U Fortuni Puovja imo vie godine 5 Pučišćanih. Uz  Peđu, Borišu i Fileta, Fortuna se pojačala sa nojbojin strijelcon lige u zojne dvi godine, našin Kaluon. Ako ubrojimo i Sašu Senjkovića i Ivicu Putvinora ko reziervnega golmana imomo i kičmu nikadašnje Vrše. A to ni jedino njihovo pojačanje, ali je, svakako, nojjače. Vie godine bidu mogli i do kraja. Spomienmo i da Vili Luštre i vie godine igro za Konobu Tomić.

PRVO KOLO: FORTUNA POVLJA - SEXY FLEXY BILBAO 3:1

Ča se tiče prviega kola, ovogodišnji ždrijeb ni bi naklonjen "baskima". Prvo kolo su morali na noge favoritu za rušenje Konobe Tomić sa trona - Fortuni, Ali Baski se nisu doli nego su čak prvijencon  Bezme u dresu Bilbaa poveli sa 1:0, Fortuna je izjednačila preko Saše Senjkovića, ali Baski su i daje napadoli, imali su i par kontri, kojuguod stativu, a i Mrtuorij je odlično broni. Rezultat 1:1 je je sto na "semaforu" sve do četiri minute pri kraja kad je Kale dove Fortunu u vodstvo. Baski su se onda otvorili ča je omogućilo Baku da zabije i treći gol. Sve u svemu, "Baski" su bili borbeni, a poraz od 1:3 protiv  jedniega od favorita ni ništa strošno. 
Da ždrijeb sad na počietku ni naklonjen Baskima govori i činjenica da u trećen kolu (u drugen su slobodni) dočekijedu branitelja naslova Konobu Tomić.
 
MOĆA NAŠI!

čobon1510
Pucisca-bb @ 11:50 |Komentiraj | Komentari: 78 | Prikaži komentare
Anketa
Kako ste zadovoljni litnim programom i događanjima u mistu?




Anketa
Koga simpatizirote od dvo Pučiško vaterpolo kluba?



Anketa
Za koga navijete u Bročkon Ligi?




Anketa
Bi misto propalo ako bi se zatvori Jadrankamen?



Anketa
Je čo maslin?





Anketa
Nojboja Pučiško stuorijica?







Anketa
Bašta- uskrsnuće?!



Anketa
Koliko se čiesto spojite na kroniku?




Anketa
Koji Brački portal vam je drazi?


Anketa
Koliko ste tekstova sa kronike pročitali?




Anketa
Smatrate li da bi stečaj bio kvalitetno rješenje za JK?



Anketa
Dakle?